- 1 ਨਵੰਬਰ ਪੰਜਾਬ ਦੀ ਵੰਡ ਦਾ ਦਿਨ ਹੈ, ਚੰਡੀਗੜ੍ਹ ਦੀ ਸਥਾਪਨਾ ਦਾ ਨਹੀਂ: ਸ਼੍ਰੋਮਣੀ ਪੰਜਾਬ ਫੋਰਮ
ਚੰਡੀਗੜ੍ਹ, 1 ਨਵੰਬਰ (ਦੇਸ਼ ਕਲਿੱਕ ਬਿਊਰੋ): ਸ਼੍ਰੋਮਣੀ ਪੰਜਾਬ ਫੋਰਮ ਨੇ ਅੱਜ ਚੰਡੀਗੜ੍ਹ ਪੁਲਿਸ ਨੂੰ ਉਸ ਦੇ 60ਵੇਂ ਰੇਜ਼ਿੰਗ ਡੇ ਮੌਕੇ ਰਾਸ਼ਟਰਪਤੀ ਪੁਲਿਸ ਨਿਸ਼ਾਨ (ਪ੍ਰੈਜ਼ੀਡੈਂਟਸ ਪੁਲਿਸ ਕਲਰ) ਮਿਲਣ ‘ਤੇ ਵਧਾਈ ਦਿੱਤੀ, ਅਤੇ ਕੇਂਦਰੀ ਗ੍ਰਹਿ ਮੰਤਰੀ ਸ੍ਰੀ ਅਮਿਤ ਸ਼ਾਹ ਦਾ ਇਹ ਸਨਮਾਨ ਖ਼ੁਦ ਆ ਕੇ ਭੇਟ ਕਰਨ ਲਈ ਧੰਨਵਾਦ ਕੀਤਾ। ਨਾਲ ਹੀ ਫੋਰਮ ਨੇ ਇਸ ਗੱਲ ‘ਤੇ ਚਿੰਤਾ ਪ੍ਰਗਟਾਈ ਕਿ ਇਸ ਮੌਕੇ 1 ਨਵੰਬਰ ਨੂੰ “ਚੰਡੀਗੜ੍ਹ ਦਾ ਸਥਾਪਨਾ ਦਿਵਸ” ਦੱਸਿਆ ਗਿਆ।
ਸੈਕਟਰ 26 ਦੀਆਂ ਪੁਲਿਸ ਲਾਈਨਾਂ ਵਿੱਚ ਆਪਣੇ ਸੰਬੋਧਨ ਦੌਰਾਨ ਗ੍ਰਹਿ ਮੰਤਰੀ ਨੇ ਹਾਜ਼ਰੀਨ ਨੂੰ “ਚੰਡੀਗੜ੍ਹ ਦੇ ਸਥਾਪਨਾ ਦਿਨ” ਦੀਆਂ ਸ਼ੁਭਕਾਮਨਾਵਾਂ ਦਿੱਤੀਆਂ, ਅਤੇ 1 ਨਵੰਬਰ 1966 ਨੂੰ ਉਹ ਦਿਨ ਦੱਸਿਆ ਜਦੋਂ ਚੰਡੀਗੜ੍ਹ ਨੂੰ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਅਤੇ ਦੋਵਾਂ ਰਾਜਾਂ ਦੀ ਸਾਂਝੀ ਰਾਜਧਾਨੀ ਬਣਾਇਆ ਗਿਆ।
ਫੋਰਮ ਦੇ ਕਨਵੀਨਰ ਅਤੇ ਪੰਜਾਬ ਸਰਕਾਰ ਦੇ ਸਾਬਕਾ ਵਿਸ਼ੇਸ਼ ਮੁੱਖ ਸਕੱਤਰ ਕਰਨ ਬੀਰ ਸਿੰਘ ਸਿੱਧੂ ਨੇ ਕਿਹਾ: “ਚੰਡੀਗੜ੍ਹ ਪੁਲਿਸ ਇਸ ਸਨਮਾਨ ਦੀ ਹੱਕਦਾਰ ਹੈ, ਅਤੇ ਪੰਜਾਬ ਇਸ ਨੂੰ ਵਧਾਈ ਦੇਣ ਵਿੱਚ ਸ਼ਾਮਲ ਹੈ। ਪਰ 1 ਨਵੰਬਰ 1966 ਉਹ ਦਿਨ ਹੈ ਜਦੋਂ ਪੰਜਾਬ ਪੁਨਰਗਠਨ ਐਕਟ ਨੇ ਪੰਜਾਬ ਦੀ ਵੰਡ ਕੀਤੀ ਅਤੇ ਇਸ ਦੀ ਰਾਜਧਾਨੀ ਨੂੰ ‘ਫ਼ਿਲਹਾਲ’ ਕੇਂਦਰ ਦੇ ਅਧੀਨ ਕਰ ਦਿੱਤਾ। ਇਸੇ ਸਮਾਗਮ ਵਿੱਚ ਬੋਲਦਿਆਂ ਖ਼ੁਦ ਪੰਜਾਬ ਦੇ ਰਾਜਪਾਲ ਨੇ ਇਸ ਨੂੰ ਰਾਜਾਂ ਦਾ ‘ਬਟਵਾਰਾ’ (ਵੰਡ) ਕਿਹਾ, ਅਤੇ ਯਾਦ ਕਰਵਾਇਆ ਕਿ ਚੰਡੀਗੜ੍ਹ ਦਾ ਭੂਮੀ ਪੂਜਨ 1952 ਵਿੱਚ ਹੋਇਆ ਸੀ। ਰਾਸ਼ਟਰਪਤੀ ਡਾ. ਰਾਜਿੰਦਰ ਪ੍ਰਸਾਦ ਨੇ 7 ਅਕਤੂਬਰ 1953 ਨੂੰ ਇਸ ਸ਼ਹਿਰ ਦਾ ਪੰਜਾਬ ਦੀ ਰਾਜਧਾਨੀ ਵਜੋਂ ਰਸਮੀ ਉਦਘਾਟਨ ਕੀਤਾ ਸੀ। ਉਹੀ ਇਸ ਦਾ ਸਥਾਪਨਾ ਦਿਵਸ ਹੈ।”
ਕਰਨ ਬੀਰ ਸਿੰਘ ਸਿੱਧੂ ਨੇ ਚੇਤੇ ਕਰਵਾਇਆ ਕਿ ਅੱਜ 1966 ਦਾ ਜੋ ਬਿਰਤਾਂਤ ਦਿੱਤਾ ਗਿਆ, ਉਸ ਵਿੱਚ ਬਾਕੀ ਰਿਕਾਰਡ ਛੱਡ ਦਿੱਤਾ ਗਿਆ। 1970 ਵਿੱਚ ਕੇਂਦਰ ਨੇ ਐਲਾਨ ਕੀਤਾ ਸੀ ਕਿ ਚੰਡੀਗੜ੍ਹ ਪੰਜਾਬ ਨੂੰ ਮਿਲੇਗਾ। ਸੰਸਦ ਵੱਲੋਂ ਪ੍ਰਵਾਨਿਤ ਰਾਜੀਵ–ਲੌਂਗੋਵਾਲ ਸਮਝੌਤੇ ਤਹਿਤ ਚੰਡੀਗੜ੍ਹ 26 ਜਨਵਰੀ 1986 ਨੂੰ ਪੰਜਾਬ ਹਵਾਲੇ ਕੀਤਾ ਜਾਣਾ ਸੀ। ਕਰਨ ਬੀਰ ਸਿੰਘ ਸਿੱਧੂ ਨੇ ਕਿਹਾ, “ਚਾਲੀ ਗਣਤੰਤਰ ਦਿਵਸ ਲੰਘ ਗਏ, ਪਰ ਉਹ ਤਬਾਦਲਾ ਨਹੀਂ ਹੋਇਆ। ਕਿਸੇ ਵਰ੍ਹੇਗੰਢ ਦਾ ਜਸ਼ਨ ਮਨਾਉਣ ਨਾਲ ਆਰਜ਼ੀ ਪ੍ਰਬੰਧ ਪੱਕਾ ਨਹੀਂ ਹੋ ਜਾਂਦਾ।”
ਫੋਰਮ ਨੇ ਅਫ਼ਸੋਸ ਪ੍ਰਗਟਾਇਆ ਕਿ ਨਾ ਸ਼੍ਰੋਮਣੀ ਅਕਾਲੀ ਦਲ ਦੇ ਕਿਸੇ ਆਗੂ ਨੇ, ਨਾ ਕਾਂਗਰਸ ਨੇ, ਅਤੇ ਨਾ ਹੀ ਪੰਜਾਬ ਦੀ ‘ਆਪ’ ਸਰਕਾਰ ਨੇ, ਸਮਾਗਮ ਤੋਂ ਪਹਿਲਾਂ ਜਾਂ ਬਾਅਦ ਵਿੱਚ, ਪੰਜਾਬ ਦਾ ਪੱਖ ਰਿਕਾਰਡ ‘ਤੇ ਰੱਖਿਆ ਹੈ। ਕਰਨ ਬੀਰ ਸਿੰਘ ਸਿੱਧੂ ਨੇ ਕਿਹਾ, “ਮੈਂ ਇਨ੍ਹਾਂ ਵਿੱਚੋਂ ਹਰ ਇੱਕ ਤੋਂ ਸਿਰਫ਼ ਇੱਕ ਵਾਕ ਮੰਗਦਾ ਹਾਂ: ਕਿ 1 ਨਵੰਬਰ ਨੂੰ ਚੰਡੀਗੜ੍ਹ ਪੁਲਿਸ ਦਾ ਸਨਮਾਨ ਕਰਨ ਨਾਲ ਆਪਣੀ ਰਾਜਧਾਨੀ ‘ਤੇ ਪੰਜਾਬ ਦਾ ਦਾਅਵਾ ਨਹੀਂ ਬਦਲਦਾ।”
ਫੋਰਮ ਨੇ ਕੇਂਦਰ ਸਰਕਾਰ ਨੂੰ ਅਪੀਲ ਕੀਤੀ ਕਿ 1966 ਦੇ ਅਧੂਰੇ ਮਸਲੇ ਪੰਜਾਬ ਅਤੇ ਹਰਿਆਣਾ ਵਿਚਾਲੇ ਗੱਲਬਾਤ ਰਾਹੀਂ ਸੁਲਝਾਏ ਜਾਣ, ਅਤੇ ਯੂਟੀ ਪ੍ਰਸ਼ਾਸਨ ਨੂੰ ਬੇਨਤੀ ਕੀਤੀ ਕਿ 1 ਨਵੰਬਰ ਨੂੰ ਚੰਡੀਗੜ੍ਹ ਦੇ ਸਥਾਪਨਾ ਦਿਵਸ ਵਜੋਂ ਨੋਟੀਫ਼ਾਈ ਨਾ ਕੀਤਾ ਜਾਵੇ।
ਜਾਰੀ ਕਰਤਾ: ਕਰਨ ਬੀਰ ਸਿੰਘ ਸਿੱਧੂ, ਕਨਵੀਨਰ, ਸ਼੍ਰੋਮਣੀ ਪੰਜਾਬ ਫੋਰਮ
ਸੰਪਰਕ: 7837-001-001 • kbs.sidhu@gmail.com
