PSEB ਦਾ ਵੱਡਾ ਫੈਸਲਾ: ਹੁਣ 8ਵੀਂ, 10ਵੀਂ ਤੇ 12ਵੀਂ ਦੇ ਸਾਲਾਨਾ ਨਤੀਜਿਆਂ ‘ਚ ਜੁੜਨਗੇ ਕਲਾਸ ਟੈਸਟ ਤੇ ਪ੍ਰੀ-ਬੋਰਡ ਦੇ ਅੰਕ; ਨਵਾਂ ਸ਼ਡਿਊਲ ਜਾਰੀ
Desh Click
ਚੰਡੀਗੜ੍ਹ/ਐੱਸ.ਏ.ਐੱਸ. ਨਗਰ , 9 ਜੂਨ 2026- ਪੰਜਾਬ ਸਕੂਲ ਸਿੱਖਿਆ ਬੋਰਡ (PSEB) ਵੱਲੋਂ ਅਕਾਦਮਿਕ ਸੈਸ਼ਨ 2026-27 ਲਈ ਇੱਕ ਬਹੁਤ ਹੀ ਮਹੱਤਵਪੂਰਨ ਸਰਕੂਲਰ ਜਾਰੀ ਕੀਤਾ ਗਿਆ ਹੈ, ਜਿਸ ਨਾਲ ਹੁਣ ਸਕੂਲੀ ਪ੍ਰੀਖਿਆਵਾਂ ਦੇ ਮੁਲਾਂਕਣ ਦੀ ਪੂਰੀ ਪ੍ਰਕਿਰਿਆ ਬਦਲਣ ਜਾ ਰਹੀ ਹੈ।
ਬੋਰਡ ਦੇ ਇਸ ਅਹਿਮ ਫੈਸਲੇ ਤਹਿਤ ਹੁਣ 8ਵੀਂ, 10ਵੀਂ ਅਤੇ 12ਵੀਂ ਜਮਾਤ ਦੇ ਵਿਦਿਆਰਥੀਆਂ ਦੁਆਰਾ ਸਾਲ ਭਰ ਦਿੱਤੇ ਜਾਣ ਵਾਲੇ ਕਲਾਸ ਟੈਸਟ, ਟਰਮ ਪ੍ਰੀਖਿਆਵਾਂ ਅਤੇ ਪ੍ਰੀ-ਬੋਰਡ ਪ੍ਰੀਖਿਆਵਾਂ ਦੇ ਅੰਕਾਂ ਨੂੰ ਮੁੱਖ ਬੋਰਡ ਪ੍ਰੀਖਿਆ ਦੇ ਨਤੀਜੇ ਵਿੱਚ ਵਿਸ਼ੇਸ਼ ਵੇਟੇਜ (ਮਹੱਤਵ) ਦਿੱਤਾ ਜਾਵੇਗਾ। ਬੋਰਡ ਦੇ ਇਸ ਕਦਮ ਤੋਂ ਬਾਅਦ ਹੁਣ ਵਿਦਿਆਰਥੀਆਂ ਨੂੰ ਸਾਲ ਭਰ ਆਪਣੀ ਪੜ੍ਹਾਈ ਪ੍ਰਤੀ ਗੰਭੀਰ ਰਹਿਣਾ ਪਵੇਗਾ।
ਕੀ ਹੈ ਨਵਾਂ ਪ੍ਰੀਖਿਆ ਸ਼ਡਿਊਲ?
ਬੋਰਡ ਦੇ ਨਵੇਂ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ, ਸਾਰੇ ਸਰਕਾਰੀ, ਅਰਧ-ਸਰਕਾਰੀ, ਸਹਾਇਤਾ ਪ੍ਰਾਪਤ (ਏਡਿਡ) ਅਤੇ ਮਾਨਤਾ ਪ੍ਰਾਪਤ ਸਕੂਲਾਂ ਨੂੰ ਪੂਰੇ ਅਕਾਦਮਿਕ ਸੈਸ਼ਨ ਦੌਰਾਨ ਸ਼ਡਿਊਲ ਮੁਤਾਬਕ ਪ੍ਰੀਖਿਆਵਾਂ ਕਰਵਾਉਣੀਆਂ ਲਾਜ਼ਮੀ ਹੋਣਗੀਆਂ; ਦੋ-ਮਾਸਿਕ (ਬਾਈਮੰਥਲੀ) ਕਲਾਸ ਟੈਸਟ- ਪੂਰੇ ਸੈਸ਼ਨ ਦੌਰਾਨ ਘੱਟੋ-ਘੱਟ ਦੋ ਟੈਸਟ (ਆਨਲਾਈਨ ਜਾਂ ਆਫ਼ਲਾਈਨ) ਲਏ ਜਾਣਗੇ। ਪਹਿਲਾ ਟੈਸਟ 15 ਜੁਲਾਈ ਤੱਕ ਅਤੇ ਦੂਜਾ ਟੈਸਟ ਨਵੰਬਰ ਦੇ ਆਖਰੀ ਹਫ਼ਤੇ ਤੋਂ ਦਸੰਬਰ ਦੇ ਪਹਿਲੇ ਹਫ਼ਤੇ ਦੇ ਵਿਚਕਾਰ ਕਰਵਾਉਣਾ ਹੋਵੇਗਾ। ਟਰਮ ਪ੍ਰੀਖਿਆ- ਸਤੰਬਰ ਮਹੀਨੇ ਦੌਰਾਨ ਇੱਕ ਮੁੱਖ ਟਰਮ ਪ੍ਰੀਖਿਆ ਆਯੋਜਿਤ ਕੀਤੀ ਜਾਵੇਗੀ। ਪ੍ਰੀ-ਬੋਰਡ ਪ੍ਰੀਖਿਆ- ਸਕੂਲਾਂ ਨੂੰ ਆਪਣੀ ਸਹੂਲਤ ਅਨੁਸਾਰ 31 ਜਨਵਰੀ, 2027 ਤੱਕ ਪ੍ਰੀ-ਬੋਰਡ ਪ੍ਰੀਖਿਆਵਾਂ ਮੁਕੰਮਲ ਕਰਨੀਆਂ ਹੋਣਗੀਆਂ।
ਸਾਰੀਆਂ ਪ੍ਰੀਖਿਆਵਾਂ ਨੂੰ ਪਾਰਦਰਸ਼ੀ ਬਣਾਉਣ ਲਈ ਬੋਰਡ ਨੇ ਸਖ਼ਤ ਨਿਯਮ ਤੈਅ ਕੀਤੇ ਹਨ। ਸਾਰੇ ਸਕੂਲਾਂ ਲਈ ਇਹ ਲਾਜ਼ਮੀ ਹੈ ਕਿ ਉਹ ਪ੍ਰੀ-ਬੋਰਡ ਅਤੇ ਟਰਮ ਪ੍ਰੀਖਿਆਵਾਂ ਦੇ ਵਿਸ਼ੇ-ਵਾਰ ਅੰਕਾਂ ਨੂੰ 25 ਫਰਵਰੀ ਤੱਕ ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਅਧਿਕਾਰਤ ਪੋਰਟਲ ‘ਤੇ ਲਾਜ਼ਮੀ ਤੌਰ ‘ਤੇ ਅਪਲੋਡ ਕਰਨ। ਇਹ ਪ੍ਰੀਖਿਆਵਾਂ ਬੋਰਡ ਦੁਆਰਾ ਜਾਰੀ ਕੀਤੇ ਗਏ ਮਾਡਲ ਪ੍ਰਸ਼ਨ ਪੱਤਰਾਂ ਅਤੇ ਨਿਰਧਾਰਤ ਅੰਕਾਂ ਦੇ ਫਾਰਮੈਟ ਦੇ ਆਧਾਰ ‘ਤੇ ਹੀ ਲਈਆਂ ਜਾਣਗੀਆਂ।
ਪਾਰਦਰਸ਼ਤਾ ਬਣਾਈ ਰੱਖਣ ਲਈ ਸਕੂਲਾਂ ਨੂੰ ਨਤੀਜੇ ਐਲਾਨੇ ਜਾਣ ਤੋਂ ਬਾਅਦ 3 ਸਾਲਾਂ ਲਈ ਇਨ੍ਹਾਂ ਸਾਰੀਆਂ ਪ੍ਰੀਖਿਆਵਾਂ ਦੇ ਰਿਕਾਰਡ (ਉੱਤਰ-ਪੱਤਰੀਆਂ ਅਤੇ ਦਸਤਾਵੇਜ਼) ਨੂੰ ਸੁਰੱਖਿਅਤ ਰੱਖਣਾ ਹੋਵੇਗਾ, ਜਿਸ ਦੀ ਬੋਰਡ ਕਿਸੇ ਵੀ ਵੇਲੇ ਅਚਨਚੇਤ ਜਾਂਚ ਕਰ ਸਕਦਾ ਹੈ।
ਇਹ ਨਵੇਂ ਨਿਯਮ ਓਪਨ ਸਕੂਲ ਪ੍ਰਣਾਲੀ ਦੇ ਤਹਿਤ ਪੜ੍ਹਨ ਵਾਲੇ ਵਿਦਿਆਰਥੀਆਂ ‘ਤੇ ਵੀ ਬਰਾਬਰ ਲਾਗੂ ਹੋਣਗੇ। ਉਨ੍ਹਾਂ ਲਈ ਪਰਸਨਲ ਕੰਟੈਕਟ ਪ੍ਰੋਗਰਾਮ (PCP) ਦੌਰਾਨ ਮੁਲਾਂਕਣ ਟੈਸਟ ਅਤੇ ਪ੍ਰੀ-ਬੋਰਡ ਪ੍ਰੀਖਿਆਵਾਂ ਦੇਣਾ ਲਾਜ਼ਮੀ ਕੀਤਾ ਗਿਆ ਹੈ। ਉਨ੍ਹਾਂ ਦੇ ਅੰਕਾਂ ਨੂੰ ਇੰਟਰਨਲ ਅਸੈਸਮੈਂਟ (INA) ਦੇ ਨਿਯਮਾਂ ਅਨੁਸਾਰ ਅਨੁਪਾਤਕ ਤੌਰ ‘ਤੇ ਜੋੜਿਆ ਜਾਵੇਗਾ।
ਬੋਰਡ ਅਨੁਸਾਰ ਇਸ ਨਵੇਂ ਬਦਲਾਅ ਦਾ ਮੁੱਖ ਉਦੇਸ਼ ਇਹ ਹੈ ਕਿ 8ਵੀਂ ਜਮਾਤ ਲਈ ਸੀਸੀਈ (CCE) ਅਤੇ 10ਵੀਂ-12ਵੀਂ ਜਮਾਤ ਲਈ ਆਈਐਨਏ (INA) ਦੇ ਅੰਕਾਂ ਦੇ ਤਹਿਤ ਇਨ੍ਹਾਂ ਸਾਲ ਭਰ ਚੱਲਣ ਵਾਲੀਆਂ ਅੰਦਰੂਨੀ ਪ੍ਰੀਖਿਆਵਾਂ ਦੇ ਨੰਬਰਾਂ ਨੂੰ ਸਹੀ ਅਤੇ ਨਿਰਪੱਖ ਤਰੀਕੇ ਨਾਲ ਮੁੱਖ ਨਤੀਜੇ ਵਿੱਚ ਸ਼ਾਮਲ ਕੀਤਾ ਜਾ ਸਕੇ।